您係唔係顧慮到要參加「仁紀中秋夜」同遲D幫囝囡報課餘活動，要填會員證號碼？唔緊要，到時您填係家教會會員，就會幫您查番個記錄（其實我都唔記咗:mrgreen: ）．

---

somimi：

咁就要睇吓您話既小班既定義係乜勒:mrgreen:
據講，響有d收生不足／過40%領有綜援學生既學校，教育局會增撥資源進行小班教學－－不過仁紀梗係冇咁幾空間．呢點，好似plee仲清楚d．
不過學校實行咗班內班既教學，唔知可唔可以叫小班教學？
目前，學校響7班中抽調咗部分有特殊教育需要既學童（每班最多12人），響上課時間內由合約老師進行小班教育．於課後時段，亦有老師跟進．
至於拔尖，則在P5、P6的補課時段，挑選英數方面的學童進行拔尖課程.
現時，P1-P2既NET，係教育局派導師提供既，P3-P6，學校則購買校外既專業服務．提供專業服務既機構係非牟利性質（記唔切個名），其老師都係頗有理念既外國人．今年，P4-6精英班（A、B）每周將有額外多一節英文課，由NET任教．另周六亦有3組課餘活動，由該機構的NET負責，約90學童可受惠（周六課程非免費，但價錢優惠）．據聞數學亦有奧數課程，不過詳情聽唔清楚:adore:

---

咁有系統既，梗係唔係我（典型既4號），係李美珊主任既資料齊，做事又唔怕煩啫（佢每次家教會活動都會對名，唔會有人可以魚目混珠:roll: ）

至於天利行，請參閱：http://www.thleebook.com/
九龍彌敦道607號新興大廈二樓商場
2388 1743

不過，其實等學校統一買，應該會平d．符太係幾典型既2號仔，應該會幾樂意幫手架喎．

---

因為鄰居兄弟之前讀栢基，阿哥之後讀海壩街官小→喇沙，所以我地響小囡2歲前，都諗住俾佢讀栢基．不過後來我帶囡囡去海韻果邊遊樂場玩，見到佢d外籍老師（好似菲籍）帶班細路去咗遊樂場，就自顧自傾偈，都唔多照顧班細佬，印象轉差．再參觀校舍，見到佢地都冇乜佈置（視覺刺激），個主任答野又唔到point，就唔係咁鍾意，結果搵咗第間老遠既nursery俾阿囡讀．

至於保護兒童會，個落地玻璃景真係幾正．我囡讀K1時佢先啱啱開，設備夠新．同區許多學童都選擇佢，所以好搶手，好似要等位，您想阿囡去就要快D排定隊先．
我識得幾多同區既小朋友響果度讀，去過其中一個既生日會，冇乜聽見家長話間學校唔好．而且隔鄰有搞得幾好既小童群益會，得閒可順便俾小朋友去參加吓間中心既活動，都好方便．

我向來認為讀全日制既幼兒園，會訓練到小朋友既自理能力，又會開心d（可能因我囡鍾意熱鬧），所以俾我揀，我會揀保護兒童會－－爭在未必有位．．．（如冇位，假如阿囝又揀讀仁紀，荊冕堂都係個就近既好選擇－－而家學卷制，全日制維返條數都係俾2千幾蚊，佢師生比例夠高，教法新，幾抵嫁．且假如升仁紀既話，會有好多同學仔一齊升，少咗好多適應既問題．）

至於哥哥，俾著我都會好頭痛．不過睇您字裡行間既訊息，您好似都已經選擇咗親情．咁剩下要考慮既似乎係解決實際既問題．

返學方法其實有另一個選擇，就係載阿囝至麗城，上7:00am開既麗城校巴（或者再早d，6:51/52am響海灣花園／海濱花園上），因為有排熬（此線最後一站在禾塘咀街，係7:35am，之後先駛返校，小朋友眼瞓仲可以瞌多唔止一陣，再唔係之前果晚錄定d深情私語俾佢，叫佢上車聽）（我地都曾錄過英文串字俾阿囡，當催眠曲）．
不過校巴公司唔會因為您放學唔搭而收平d，一樣要俾全費(此線除禾塘咀街外，今年月費一律$450，明年唔知會唔會加)，就幾唔抵既．

至於谷唔谷既問題，係睇不同班不同老師既教法，但最重要都係家長點睇．
舊年E班功課之少，令同級既家長都好羡慕，但佢地班既平均成績係最高既．家長間既話題亦常提到成績排名（聽講浸聯似幼稚園一樣，冇排名，只有評估報告），同時亦會俾額外功課予子女做．
不過總體來說，仁紀其實傾向於小一唔俾咁大壓力家長同d小朋友，d老師都偏於寬鬆．

（我都幾想知浸聯有乜魔法棒，俾小一生咁大自由度下，到高年級又可以谷到升學率咁高？可惜我識得既都係同級同學仔．至於馬基，縱然係我果位選擇咗馬基，見到囡囡返學好開心既朋友，都有話過因為唔係太滿意該校既升學率，諗住高年級可能俾個囡轉校．不過等仔女適應咗，可能就唔會咁諗？）

既然阿囡而家揀咗仁紀，我地好自然有歸屬感，會覺得仁紀好D（浸聯我聽到既負面意見，倒都係入唔到去既家長覺得佢大鼻．仲有我果位冇宗教背景、揀咗馬基既朋友，話開放日時校長好似幾傲氣，馬基既小二家長，亦對老師大讚不絕）．
跟功課方面，深井小童群益會都有課餘功輔班，ok有口碑，不過位很少，最好暑假已報定果時既全日制功輔班先，會較易插隊．

小朋友係6-12歲呢個階段，都幾影響個人成長（不過我覺得幼稚園仲重要d），揀校呢樣野，最好唔好俾d短暫因素，例如同嫲嫲近唔近（假期多d去咪得咯，又難保呢6-8年佢唔會改變主意，搬去同您地住）之類影響，最重要係判斷邊間學校既校風適合您兩位小朋友，取其中位數．好老實講，我而家湊返學搭車回家，坐34響麗城轉車時，有時都忍唔住想，假如當初幫阿囡選擇浸聯，又會點呢？

－－我唔知未發生咗既事會唔會好d，只知道而家既選擇都唔差．仁紀冇我當初估計咁重成績（果時我真係一力反對，但係老公好強調習慣咗其實唔係用好多時間－－佢自己就係，對阿囡黎講，要睇狀態），功課量而家都覺ok合理，係就係返學放學遠d，但係佢細個時習慣咗行遠d，中學時就適應好d，到時點都要出去架啦．

最重要係阿囡讀得開心，就算成績唔係好好，都ok有自信，舊年都有機會做班長、行長、科代表等等（仁紀好多呢d位，班長亦有4位，佢個班班主任既政策，似乎係2個乖既搭2個活躍既，我囡上次就因為上手女班長太活躍被換掉，而做咗替工班長）．聽講高年級仲有好多有責任需負既大哥哥大姐姐崗位．

我諗無論揀邊間，您最好都度好放工時間（返工咁早，放工會唔會早番d？假如係，早返早放既仁紀，可能更適合您，浸聯好似係返8點半，您出咗門口，阿囝都未需要起身，可能對少寶貴既一陣）
－－初小既適應階段，其實好需要父母在身邊支持同看顧．就算揀浸聯，功課雖然相對少，但係都有每日一篇同埋某d報告，要親子伴讀或一齊做；而小一係建立孩子學習習慣的關鍵期，未必可以單靠外傭姐姐既人身照顧，就可以正確建立既，到時最緊要多留點時間給他們:-) [ 本文章最後由 csy_ma 於 07-9-11 01:13 編輯 ]

---