[i=s] 本帖最後由 hkpapa852 於 18-5-11 09:33 編輯 [/i]
自從聰明絕頂既財爺, 公佈下年為DSE考生繳交考試費, 馬上一石激起千層浪, 引發出多個不同話題, 包括全民裸考DSE, 國內大軍搶攻DSE等.
我對"國內大軍搶攻DSE"呢方面比較有興趣, 所以又88啩啩去查証咗一D資料.
而我認為最重要既, 係以下一點:
- 非香港學生, 只要手持DSE成績, 一樣可以參加 JUPAS, 取得UGC學位 (不過佢地其實係用緊非香港居民既額外限額，而且要俾3-4倍學全費, 實際上不會用去本地學生既UGC 學額)
咁非香港學生只要考DSE就可以透過JUPAS取得UGC學位, 對香港學生有咩影響呢?
其實整體香港學生可以取得既整體UGC學額係"無影響"
無影響? 咁嘈嚟做乜?
又等我用我擅長既數字俾D資料大家睇吓:
假設某一年度, UGC 留俾香港學生既學額有 15000, 按照要求, UGC 可收取額外20%既非香港學生. 另外, UGC每年只配予 JUPAS 和 Non-JUPAS 既學頧, 係大約4:1, 所以:
(A) UGC JUPAS 學額: 12000 (只給DSE考生)
(B) UGC Non-JUPAS 學額: 3000
(C) UGC非香港學生學額: 3000
如果 JUPAS 取得學額中, 有 150個係非香港人, 即香港學生只能透過JUPAS分到 11850 個UGC學額 [ 即 (A) 類 ], 香港既DSE考生, 將會失去了150個UGC 學額
因為個 150 個學生係非香港居民, 所以佢地既學額, 會計入 (C) 類
問題出現了, JUPAS 少咗香港學生取得香港人既UGC學額, 咁餘下既學額會如何分配呢? 相信好大機會, 大學都撥去用作 Non-JUPAS 收取本地學生.
假如有150個非香港人以DSE成績取得JUPAS學額, 結果:
香港DSE考生可取得既JUPAS學額: -150
香港學生以Non-JUPAS可取得既學額: +150
簡單一句, 即是考 DSE 既香港學生, 入大學既機會低咗, 以非DSE成績考大學既香港學生, 入大學既機會高咗.
咁EDB其實係咪鼓勵大家, 唔好去考DSE, 應該擁抱海外學制, 以非DSE資格入大學呢? 叫大家放棄自家制定既DSE?
另一問題, 以DSE成績透過JUPAS取得UGC學額既人, 用去了(C)類既學額, 咁其餘以IBDP, GCE-AL等資歷來報考既學外學生, 機會又低了....... 到時, 香港既大學, 離"國際化"恐伯只會越嚟越遠, 離"國化"就越嚟越近.
香港大部份學生, 其實都係要透過考DSE和參加JUPAS去取得大學學位, 但似乎香港既教育部門, 完全沒有為佢地自己制定既學制既學生, 提供完善既升學保障.
需要應考DSE透過JUPAS入本地大學既家長, 要有心理準備可能面臨既衝擊 (是否杞人憂天?)
至於其它影響, 如非本地考生會否令本地考生既DSE成績下跌? 有可能, 不過只限5級以上既成績. 而且相關問題, 個人認為, 不及學位分配機會被減低咁嚴重
******
【更新: 2018年5月10日】
隨著葉建源議員在2018年5月9日於立法會上代為提出類似問題，似乎我估計既問題，未必會出現，大家可參考下：
2018年5月10日立法會第16題問答 既內文
以上會議記錄中，有以下一段，都尚算解釋咗我上文既疑顧:
教資會資助大學一直採取適當措施，以確保本地生的入學機會不會因非本地生的聯招申請而受任何影響。簡單而言，非本地生的聯招入學申請只會與其他非本地生的非聯招入學申請一併考慮。如大學決定取錄一名透過聯招申請入學的非本地生，校方不會把該申請人計算在有關教資會資助課程在聯招下招收本地學生的學額內。因此，非本地學生不會與本地學生競爭教資會資助學額。
如果理解無錯, EDB話目前大學自己有適當措施，會在JUPAS派位時，將非本地學生既申請人，改去另一條隊，而唔會扣去本地學生既JUPAS學額。
不過EDB另一句說話 "非本地生聯招申請只會與其他非本地生的非聯招入學申請一併考慮"，又真係好有問題，簡接又另人懷疑，EDB到底講既嘢係咪真嫁？因為現實係咁既：
無論係本地學生定非本地學生去報考非聯既學位，非聯既招收安排同結果，一般最早5月就公佈，大部份亦會係6-7月出結果。但DSE成績要到接近7月中先出，聯招結果公佈更在8月先出，點可能一併考慮?
如果某課程已係非聯招時已收足20%非本地學生, 咁用聯招申請個班非本地學生即係根本唔會有得入，但佢地又唔知，咁咪即係俾人誤導？
|
