歐聯決賽老公話約咗班friends 去酒吧睇波，老婆唔明屋企明明 now 和 cable 都俾哂錢，出去又嘈又逼又貴，點解仲要出去睇； 老婆用5位數字買名牌手袋，老公嘀咕覺得同個環保袋差不多； 妹妹默書100分，想媽媽買枝角落生物鉛芯筆做奬勵，媽媽一睇價錢，話pilot 都係10蚊枝，點解要為咗個公仔俾多5倍錢； 我係想講的是每個人的「心頭好」都唔同，唔可以用自己把尺去衡量，而「心頭好」所帶來的滿足感和快樂，唔係同道中人是不會理解的，所以你唔需要質疑值唔值得，反而個重點是駛錢的態度和唔應該對父母講大話。借錢消費當然一定唔可以，但就算自己儲，都唔會用全副身家去娛樂。小朋友學理財，通常都會教將大部分錢儲蓄以備不時之需，小部分消費，再小部分做善事。我唔知你幫佢儲咗幾多利是錢，但咁多年我估都有幾萬啩，你又可唔可以試下同佢定一個achievable 的目標，如果達到就「批准」佢動用二十分一甚至三十分一的儲蓄俾佢買心頭好呢？當然亦要事先講明咁會用哂佢一年的消費quota，唔好過兩個月又打主意再買。 佢講大話一定係唔啱，但你有冇諗過佢知道你一定落閘冇商量餘地，所以先咁大膽？六年級年紀唔大亦唔細，已經唔可以再單向的話什麽准什麼唔准，反而要有溝通有商量他才會心悅誠服地做或不做，趁佢還是可以控制的年紀，大家建立返個關係更重要。我明白電玩可以是一個無底深潭，唔想佢沉迷，大家更需要保持一個「有計傾」的關係才可以改變和影響佢。 今次講大話無論如何都要罰嘅，但最好罰一些佢肉痛之餘又承受得起嘅懲罰，delete game 就唔好喇，因為有d戰鬥力丶武器丶寶石之類係日積月累儲返來的，可能用錢都買唔返，你delete 可能真係會發癲的。
