Quote:poutpoutfish 發表於 21-11-5 22:07 我地仲細個,自己係屋企玩下數學遊戲咋。幾粒波子都可以有好多種玩法,可以分類可以計下數(eg十粒波子眯 ... 多謝分享呀
我都認為自學最好, 可以因材施教 我仔仔細個時我地都有同佢玩吓啲簡單數學遊戲, 不過都好簡單 其實我都唔係好知點講....我仔仔性格有啲特別, 自己教佢係有啲困難
情況係咁的, 恕有啲長... 仔仔本身無表現出對數學有興趣, 在k2停課其間, 學校無堂上, 我地想教吓佢啲簡單加減數(之前數手指都未教過佢) 仔仔竟然話早已自己諗到計多位加減數的方法(我地完全唔知有咩啟發佢) 之後教佢3,4,6的乘數表, 想再教佢其他時, 佢就話已經知道規律, 便一口氣背晒其他乘數表(甚至發現到9的倍數的特別規律) 過多一排, 乘數概念較穩固後, 想教佢除數, 佢又話識.... 我話無人教過你又識? 便故意俾條雙位有餘除數佢計, 佢真係心算計到正確的商和餘數
雖然啲數佢係計得啱, 但佢計的方法係自創, 所以計算戶法係有啲特別, 以及因為係全心算, 在計較多位數運算時, 速度上會計得慢過紙算 再俾多啲位數的計算佢, 其實個腦已經計唔到
當我地想教佢傳統的計法, 由於佢有好強的自尊心, 同埋佢認為自己已經諗到方法, 佢唔俾我哋教...堅持用自己的方法 所以就算佢識四式運算, 都仲未識用傳統直式方法計
另外, 佢有ADHD, 唔會坐定聽我地講嘢 而且佢經常在意想不到的情況下會情緒爆發到失控, 試過見佢諗一條問題好似諗唔到, 係咁易提咗佢一下, 佢就失咗控, 因為佢要自己諗 教佢係嘔心瀝血, 一來教唔到啲乜, 二來影響親子關係
因此現在我哋教數的方法都係啟發性, 有意無意地在生活中或遊戲中滲啲數學概念俾佢就算。 傳統的教學就交番俾老師,
早前我哋便俾佢去間數學連鎖學校上課, 對於老師的教導, 好彩佢係會聽, 不過每周一小時課程, 佢半小時做晒教師俾的堂課和家課, 老師卻叫佢擦番啲家課留番屋企做, 然後要佢畫公仔或者伏低訓一陣... 我地同老師了解過情況後, 老師就將同類的題目加倍俾佢做... 真係唔知好嬲定好笑, 所以學了幾個月便停了。現在繼續找吓合適的實體課程....
講番, 我個仔仔細個時, 興趣都係好單一, 迷上一樣嘢就會異常沉迷, 佢的社交好弱, 唔同同齡的同學玩, 有感統(五感都異常)和情緒問題, 專家評估話佢係接近自閉(話差一兩項徵狀理論上就係)... 所以我會引誘佢玩好多時下細路鍾意的玩具, 遊戲機和睇卡通片, 一齊同佢研究策略, 討論劇情等... 又同佢參加唔同的群體活動 等佢可以同其他小朋友相處, 多啲話題, 容易融入啲 比較希望佢可以均衡發展
|