其實佢哋第一日放學都好似幾混亂, 同學仔媽咪話佢自己成12:25先接到仔, 校車12:30先走, 爺爺照佢哋所安排時間12:50到樓下接放學, 13:20打俾我佢未見人, 於是我打俾司機, 佢話冇阿仔落車個站, 而家去左石排灣,尾站先返去喎, 咁我問佢你仲有幾多個站要去, 大約要幾耐先返到去放低我個仔, 佢話通通都話唔知, 咁我就打俾負責人, 佢話如果司機喺石排灣, 下個站就差不多到, 因為個司機同我講佢唔識路, 所以我同負責人講叫佢會唔會打俾司機confirm 吓順便引導吓個司機, 都未講完就cut 左我線, 十分鐘後再打俾司機佢話佢喺香港仔, 要去邸政局, 仲問我點去, 我仲聽到佢話啲小朋友同途人, 我再同佢講, 我唔知你郵政局個站喺邊面, 不如你打佢x 先生(負責人)啦, 佢話x先生都唔知喎, 幾經轉接之下, 佢去到郵政局放低左個小朋友, 咁我再問佢係去利東喇, 佢話係, 咁我叫佢出返海傍條路, 之後佢又問我點去逸港居, 我即刻話你要上左利東之後順路返落去逸港居, 如果唔係有排行, 於是我就遙控司機點去利東, 最後差幾分鐘到2:00 爺爺先"順利"接到阿仔, 原來唔止我一個遙控"教路", 喺我同司機講緊嘅時候, 我老公又不停打俾司機(咁當然係唔通啦), 我成功教左司機送回阿仔去爺爺度, 大功告成當然收線啦(不過都有同佢講叫佢順住條路落返橋, 嗰度就係逸港居喇), 之後就到我老公打到俾司機, 就係咁教埋之後嗰段路喇!
星期一六點幾, 我諗住打俾褓母問吓佢明天路線同接仔時間, 冇人聽留口信, 琴日早上九點幾再打再留, 十點幾都未覆, 只好再打, 好彩打到, 直接對話, 但佢都係咩都唔知, 每個問題都要問背後個"司機", 之後個"司機"攞左個電話嚟聽, 佢叫我12:30落去接仔, 我認到佢把聲, 問佢係咪x先生呀, 佢話係, 咁我客氣地同佢講, 琴日兩點鐘先送到阿仔返去, 佢話因為塞車, 我就話唔係只係塞車喎, 連個司機都完全唔識路, 同埋好好聲氣同佢講琴日好似成12:30先喺學校走, 會唔會可以差不多通知我唔唔駛老人家等咁耐, 佢一口不客氣地話"我唔會打電話架, 你哋啲家長有責任要準時, 個個都要我打先落嚟, 個個都我我遲5分鐘, 唔得囉", 我話"冇問題, 但你咁講我會準時12:30接仔, 但你都要準時囉!" 佢再話"反正你都係搭個兩月, 我而家唔接你個仔喇, 我退返錢俾你, 琴日我當送俾你" 我話"你唔可以話唔接就唔接, 你收左我錢就要接, 我要求只搭九月, 你話要收兩個月, 我又照俾兩個月, 你而家話唔接就唔接, 冇可能囉, 我可以報警架喎" x先生"你咪報囉, 我又唔驚呀!你最好報警叫差人幫我開路呀!, 我而家係唔接你個仔呀! 咁你12:30等唔等?" 我話"x先生, 我由頭到尾都冇話唔等, 你話12:50, 我都係12:50等啦, 等到2:00, 我教司機路, 都係咁啦, 你話12:30, 我一定12:30前去到, 但你都記得要準時囉嗦"
你哋話係咪真係超過份先!
|
