考G.2/G3先，兩睇啦！咪睇G2同G3只相差一級，對細路黎講，考試曲目深左，要背的Scales & Apeggios亦多左，sight reading難左，而且人大左，自我意識亦強左，所以考試時同時要應付好多野但又要控制自己唔好驚，都唔容易。

先考一個容易d的試，有理冇理先取得一個成功的經驗(因G2較容易，相對容易d取得Merit/Distinction)，對細路仔的心理狀態有好大鼓舞，自信增強，可能有助減少對日後(學G3/4/5時)學琴遇到困難而引致的心理障礙。同埋至少個細路會知道考試係點樣進行，程序係點，咁日後再去考琴(G4/5)，就少左一個顧慮，因為已經有經驗。從以上呢個角度來看，考G2亦未嘗不可。當然，如果程度未夠就唔好夾硬黎，如果程度夠的話，學緊考試歌之餘都可以加插其他曲目學習，唔會浪費時間同金錢。

我亞仔由5歲生日前後的日子開始學琴，到e+半年，彈到G1的書，我預算08年尾比亞仔考3級。其實在整個學琴的過程來講，一考考G3一定比先考G2 effective，我唔呃你，否則我自己唔會咁樣做。但凡事有代價，一考考G3對細路仔來說都幾辛苦，個細路唔多唔少都要受壓(因為1st 考試加上考試內容都豐富架)。同埋好坦白講，唔好旨意個小朋友會自己練琴練得好好(唔係冇咁ge小朋友，但唔多)，大人平日都要輔助，否則只靠細路，由初至3級，條路程實在幾遙遠。試想想，1week先見個老師1次，1次先得30/45min(通常)，邊記得老師果堂教授內容/要求？冇跟住要求去做，即係走左冤枉路，自然費時失事，唔知你同唔同意？

考完G3，頂龍考G5/6，唔可能一下子跳得太遠。而考完G2，可以考慮考G4/5，有左一次經驗墊底，我會建議G5。
如要考G6，必先考取G5樂理筆試的證書，所以由G3去G6，唔係咁直接及容易，各位媽咪唔好諗得太理想，以為3去6去8，話都冇咁快！

所以綜合平衡各方面因素，揀一個最有利自己兒女的做法，唔好人云亦云。

另外，想補充一點，如果逐級考，年年為果幾隻歌學琴，當然唔健康兼冇必要。但適量地考試係必需，因為處理考試歌比平日學琴的歌處理要精細得多才可以取高分，由於處理演譯精細費時，可能令人誤解為浪費時間，其實不然，小朋友在學考試歌的過程中正在學習演奏，演奏本來就係一種精細的工作，同平日學琴唔同，平日學琴做到每個學習階段的重點即可，較粗枝大葉，重質但同時也重量，而考試正好給予演奏的機會，但考試/比賽/表演太多，係十分影響學習進度，大家要小心平衡。