hi 各位, 講下囝囝大約情況...

那天去到精神科見醫生, 醫生同呀仔耍左一輪 (傾計/說笑), 及我向醫生報告這幾個月發生的事, 醫生亦反映這是a仔正常的行徑. 咁傾到食藥問題, 我話可唔可以轉concerta試下, 醫生就好詳細咁講左同ritalin 既分別, 佢對concerta的評語係正面的, 話對服用者係比較好, 因為唔似ritalin咁維持大約4小時, 而且小朋友消化能力高時亦藥力消失得快. 而concerta係胃部慢慢滲出藥性, 令到服用者既表現比較平穩, 唔會有大上大落既情形. (呀仔亦插口話依家食緊d藥好苦, 唔想食, 咁醫生又應酬左佢一陣).. 咁佢亦話知道有d家長放假唔俾小朋友食藥等佢放鬆下, 佢話咁係唔好, 因為變得佢情緒上落好大, 可能有d家長覺得佢自己頂得順個仔東摸西摸左摸右拿, 但其他人就唔會, 出街亦唔方便, 下下叫要停, 家長亦好大壓力, 所以佢建議假期亦繼續食藥. 亦身體唔需要星期一返學時再重新適應藥性. (令我諗起, 可以安排興趣班都係時候了, 醫生呢番話好似講佢參加興趣班不受控而淪為導師都唔喜歡而講的, 我似乎找到啟發)

咁我亦推個波俾醫生叫佢唔好再話自己有過度活躍症而在課室推跌d桌椅又玩窗簾繩, 醫生亦好serious 話佢唔好再咁做, 呢個過度活躍症係唔會係咁推跌d桌椅, 亦會傷到同學, 出事要坐監架, 唔好叫佢幫手寫report, 就算搵佢寫佢實行寫實情跟本唔關有病事皆因係你頑皮搵籍口. 咁個仔就尷尷尬尬笑笑咁.

咁當中亦有提到iq test, 醫生話佢唔準備俾佢做, 皆因佢唔係智力有問題.

咁佢俾左15日試用庄我. 咁開始試時, 幾日後.. 副校長巳特登搵我話轉左藥個反應好正面, 訓導主任亦有留意到改變, 話佢好平靜, 當中有時頑皮舉動時亦叫得停, 呀仔亦控制得到. 我再問其他學科老師, 佢地反映都係乖左.

而我亦察覺到佢有情緒有改善, 例如坐車食飯唔係周身郁, 聽到我既指令亦做到, 沖涼唔會話淋水上到假天花,(真係激屎). 唔會話講完又衰同一樣野.

總而言今次改變係正面的.

而我亦認真計劃來年學期同佢轉校的事, 我打算同佢轉沙田禾輋既小學(邊間未諗), 主要希望功課可以輕鬆d, 自己理念覺得小朋友生活唔係追成績, 係希望有時間去玩, 學下課堂以外既野. 打過電話問各禾輋小學, 都係話時間太早啦, 應該係5-6月先做新學期轉校生既. 希望到時可以順利.

較早前仔仔既幼園教師打黎, 問我知唔知如果係醫管局度開左file, 咁對佢升中既派位係好有影響的, 例如成績可以派到band1, 因為有file開左, 而教統局可以派到佢去band 3, 我聽到後就同呢位幼園教師講, 管它呢, band 1 有差學生, band 3亦有好學生, 我唔介意佢去band 3, 最緊要佢開心, 而且政府d野成日變啦, 個仔升中係幾年後既事, 再者我依家係需要呢d資源, 亦唔會因為影響所謂派位而唔去覆診, 再者呢個症唔係我個仔一個有, 我相信咁唔公平既派位方式一定有家長出黎講的.

而我亦想問下各家長, 自己去買藥, 藥既價錢係咪劃一呢, 定係間間藥房唔同?

暫時分享咁多先! 各位努力!!

:roll: :roll:

---