回覆：聖公會荊冕堂士德幼稚園

帖子列表  登錄   
| 2006-10-17 13:12
itbc：

以下係喺另一個欄裡面抄嚟嘅，也供您參考（我將浸聯講錯做荃浸），不過佢真係好難入，龍年爭位爭得好恐怖，不過都有家長靠誠意叩門：
（每日1貓，1fax同電話，都係唔同內容，又為咗報讀浸聯由九龍塘搬入麗城，去叩門嗰個仲係爸爸添！最後收咗，成日接佢電話嗰副校長答佢爸爸點解收咗佢個仔，話：”因為佢有個好爸爸囉！”）
我哋都係因為怕抽唔到到時好徬徨，同埋爸爸話佢當年做功課做得好輕鬆（佢幾兄姊都係仁立下午畢業），又同阿囡落晒藥（囡囡喺第一階段後，就好自豪話會讀爸爸間學校），先揀咗仁紀（仁紀都唔係唔好，我都要睇吓個囡適應成點）。

sumsumlam,

不如我講多小小有關浸聯的資料等你好作選擇。

浸聯的成績好我想很多人都會知道，連續幾年band 1的學生差不多有三分之二，成績在荃葵青排在第一，而且band 3的學生非常之少，可以講不論是拔尖或補底的工作都做得非常出色，可以試比較浸聯和基慧學生的banding:

浸聯 : Band 1: 62.2% Band 2: 30.2% Band 3: 7.6% (2005年)
基慧 : Band 1: 52.4% Band 2: 25.5% Band 3: 22.1% (2005年)

基慧的成績在荃灣已經是排在二三位，其他的學校和浸聯的差距就更加之大了。

另外浸聯曾經在1999年和2004年做過兩次校外評核報告，其中學生在香港學科測驗中的表現在短短的五年有了非常顯著的進步。

“在去年的香港學科測驗中，學生在中、英、數三科的平均成績略高於全港平均水平，其中以英文科的成績較佳。”(1999年)

“在過去兩年的香港學科測驗中，學生的數學科成績高於全港平均成績，中文和英文科成績更遠高於全港平均成績。”(2004年)

我在教統局的網頁裡看過近百份的外評，能夠在中、英、數三科中任何一科取得遠高於全港平均成績的學校已經是少之又少，更不用說能取得兩科，在這百間學校中唯一能勝過浸聯就只有沙浸。隨著浸聯近年來大力鼓勵學生參與奧數訓練和比賽，相信學生在相對較弱的一環又有了不少進步。

浸聯在荃灣區的受歡迎程度與日俱增，可以從這幾年的自行收生人數反映出來:
2004 : 248人 (1:3.1)
2005 : 288人 (1:3.56)
2006 : 356人 (1:4.45)

試比較基慧:
2004 : 156人 (1:2.45)
2005 : 152人 (1:2.38)
2006 : 128人 (1:2)

你可以看到浸聯的受歡迎程度在學生不斷下跌的大勢下反而急速上升，這或多或少反映到學校的成功之處。

去年我仔仔的幼稚園差不多有一半家長(四五十人)在自行收生階段選擇浸聯，而最特別的是連校長的仔都選擇了浸聯，他們家住九龍而跨區報讀，這位校長以前曾在九龍城一間有名連小學部的私立幼稚園作過多年校長，其實以她的江湖地位想找一間比浸聯成績更好的學校應該不難，但最後她都將小朋友山長水遠送來浸聯就讀。

另外浸聯至少還有以下優點:
1. 校長領導有方，學校管理完善，上下一心。
2. 老師有愛心，肯付出私人時間關心學生，不會label壞學生，以讚賞來鼓勵學生參與學習
3. 少考試(2次)，無測驗(0次)，少功課，無精英班
4. 比較活動教學
5. 校舍在荃灣算做不錯
6. 浸信會學校比較著重宗教教育，校長老師都是委身的基督徒，學生在他們的教導下屬靈生命會得到更好的幫助

不錯學校的距離是選擇學校一個非常重要因素，但荃景圍和麗城不境只是一街之隔，的士二十元有找，讀浸聯每月只多花數百元的保母車費和的士錢，可能上幾課phonics便花掉了，但別忘記小學是讀六年的，而且良師益友更是影響一生。去年我就是為了要讓仔仔考入浸聯，特意從海濱搬到麗城居住。

sumsumlam,我覺得妳何不將選擇權交給神，在第一輪自行派位揀浸聯，而第二輪統一派位就第一志願揀基慧，如果抽到浸聯便開開心心讀浸聯，如果抽不到浸聯就平平安安讀基慧。

婥蔚媽咪 | 2006-10-17 13:32
心玥媽咪,
下面個網係講有關仁立同仁紀既野,你可以睇下~~
http://www.baby-kingdom.com/modules/newbb/viewtopic.php?topic_id=423458&forum=68&17
咁浸聯我聽番黎既意見都係正面既~~如有機會入,亦不妨試試,你可以分析俾心玥聽你有既資料,然後讓佢選擇,咁我諗佢可能會接受多D~~因不整齊而付到小朋友大受壓力實在不好~~好在有你同佢一齊JA,否則情況可能更差~~~
我都希望有好消息,BUT下年先到我,我已好緊張,都唔知到時我會否失眠~~
| 2006-10-17 20:10
婥蔚媽咪：
轉校係一個幾嚴重嘅決定，朋友勸我睇多囡囡一個學期先決定。佢話，浸聯雖然對外宣稱係活動教學，網上一樣有媽咪講，話佢多功課。我會搵機會再問清楚翶朗媽咪先。
朋友仲話，09年會搬到深井區嘅柴天其實都唔錯，派位成績好，視學報告亦與浸聯不相伯仲，我囡隔鄰嘅朋友仔讀柴天，每星期默三課中文(!)，但係下晝響學校可以溫到書，做埋功課，慳番好多時間，佢成日都想搵我個囡玩，似乎讀得幾輕鬆。
我遲吓得閒時再搵吓仁紀/浸聯/柴天嘅視學報告嚟比對吓先。不過朋友話，而家囡囡遇到嘅問題，其實去其他學校都會面對到（因為世界係殘酷嘅，寫字唔靚係蝕底d嘅），其實亦係適應嘅問題，不如引導佢點樣解決個心結，睇定d，睇吓佢讀得開唔開心至算喎（囡囡而家為咗抄寫功課獲得高分，會抄多好多字，例如老師要抄7行，佢抄埋其他嘅字抄夠12行，仲話老師話咁會高分d喎，除了用多咗時間外，都係另一個應付默書嘅方法）。
至於仁紀，你條link講嘅嘢我有啲唔認同：
1. 據而家P6嘅媽咪講，校長搬校後好辛苦，好夜先返屋企，咁講法，應唔係呢幾年換咗校長（聽講舊校有，不過舊校會將300幾個叩門學生和家長約埋同一個時間約見，好似哂馬咁，功課又多，肯定唔係我嗰杯茶）。
2. 我暑假執番間細房俾囡囡，都執咗個幾月，期間將電腦搬咗出廳，連唔到線，間屋笠笠亂－－3人之家都會係咁，搬校同轉全日制咁大件事，行政有d混亂照理唔奇。不過據P6家長講，搬校後總體係好咗，且在改善中，校長亦愈嚟愈親民。
3. 我buy年輕嘅老師，因為佢哋冇咁"油"，仲較為容忍學生嘅差異性，肯用多啲鼓勵嘅方法對付學生，且佢哋冇之前嘅對比，在繁重嘅工作量下更有彈性－－當然，教師係對人嘅行業，好講求經驗，但仁紀嘅老師似乎唔係咁多fresh，就算係新老師做班主任，都有多個老老師帶住。我諗嗰位家長係放大個別情況。
4. 至於興趣班後嘅校車接送，而家已經解決咗，周一至周五參加興趣班都有校車，剩周六冇。參加家教會時，上屆主席亦有提到，校方因為聽到有家長意見，叫家教會特別開咗個有關校車嘅座談會，仲迫校車公司提供少收一個月車費嘅優惠，唔係佢講嘅冇理到。
婥蔚媽咪 | 2006-10-18 14:00
心玥媽咪:
轉校既問題的確係要三思呀~~落錯決家會影響左囡囡既發展,我諗你睇家d都係好既~~
一星期默三課中文!!! :-o 好誇張呀!!加埋英默,咪即係日日都默!!!!
照你睇,咁似乎仁紀又唔係咁差jei~~但如論成績,係咪因為仁立谷得勁d,所以較好呢??因睇番佢個網,去年佢有成60個學生入左林護bor~~~
咁到底係邊間好d呀~~真係好亂..... :giveup:
itbc | 2006-10-18 14:27
我諗讀仁紀同仁立, 都會辛苦, 唔單小朋友辛苦, 連阿媽都辛苦呀.

又想佢地讀到好學校, 又怕佢地辛苦讀得唔開心, 真係好煩呀.
itbc | 2006-10-18 14:28
heart,
多謝你的資料, 我地對小學有更多認識.
itbc | 2006-10-18 14:32
星期5 k1 & 2放期一天.
fannyfym | 2006-10-18 16:30
婥蔚媽咪/心玥媽咪

見到你地為小學煩惱,真係好頭痛!....諗起出年輪到自己就慘!!
煩完小學,跟住又到中學,依家做家長實在辛苦!!!

一起加油,加油!!!
| 2006-10-18 19:48
婥蔚媽咪：
柴天係一次過默三課，我試過邀請嗰位小朋友嚟溫默書，發現每課都有深字，一次過溫三課都好惡搞。但第二日佢想搵我個囡玩時，我問佢溫完默書未，佢又話響學校溫晒嘞。據佢講，每個星期都係要默三課，家長都係唔易應付。
不過我朋友話到該校參觀時，校方搵了位課程主任向家長解釋，又有紋有路，顯出處處為學生著想的地方。
所以佢話，揀學校一定要親身接觸，都唔知點解荃灣區有家教聯會搞全區小學嘅參觀，而葵青區冇？好彩婥蔚明顯較同齡孩子醒和成熟，考名校唔係問題，你哋又諗住讀私小，先冇咁煩。
至於仁立同仁紀，一向都係仁立谷得勁啲，仁紀谷功課外，仲谷閱讀或服務之類，學生發展可能較全面。單看上課時間，仁紀8:10上課，無論學生有幾早到，一律在地下操場排隊，已經同仁立要求學生7:45（我唔記得係7:30定7:45分）到校，提早入課室自行早讀，再落地下開早會嘅政策好唔同。
我並不太心儀仁立或仁紀，另一個原因係我以前有同事係林護畢業，仲係top嗰隻，先做暫取生，入u後又以交換生身份去美國。但佢極度不喜歡林護，話學校對分數好勢利，佢已經係替學校增光嗰隻，都有咁嘅感覺，成績稍差嘅咪.....
我好信與其做大池小魚，不如做小池大魚。我試過遇到兩位同事響唔係好熟嘅情況下，講講吓嘢會喊，一個畢業於林護，一個畢業於St Paul's Convent，所以就唔係好鍾情於名校。
不過，名校都有好多種，不可一概而論，但睇一間學校，可能除咗睇佢哋點培養top嘅學生外，仲要睇佢哋點對啲冇咁叻嘅，此所以，像荃官小般對學生差別對待嘅學校，都要諗吓自己個仔女入唔入到精英班先好。
| 2006-10-18 20:18
Itbc、fannyfym：
唔駛客氣，知多d之後，有沒有後悔揀了間標榜愉快學習的幼稚園？
我記得K1時同張校長傾開偈，話唔係好鍾意仁立同仁紀，因為佢哋多功課。張校長答話，其實小學都好想改，但係更難改。
周六帶囡囡上興趣班，同士德畢業啲同學仔家長打牙較，佢哋有d都諗緊俾唔俾個細嘅響3-6歲繼續愉快學習。
有個家長承認個囡響士德學到廣泛和多嘅知識，但認為咁做無助於佢而家對付英默（冇乜聽過有人中默不掂），唔怕英文。
所以士德嘅家長宜早作部署，除咗俾佢哋響士德愉快學習外，仲要：
(1).K2報讀珠心算班－其實士德校內的已足夠了，但囡囡有個同學仔學咗第一階段冇學落去，而家對數嘅概念就較弱，追得比較辛苦。另外有啲同學仔去愉景新城嘅天秤學，已學到百位數，我問d家長佢哋學得辛唔辛苦，佢哋話每日做15分鐘練習而已，各位家長，呢d練習最好響仔女幾得閒，未受壓力時做咗佢。
(2).報拼音班：我個囡K3時除咗響士德讀全日班外，仲響出面報讀一星期三日，每日兩個鐘嘅外教英語課程，且平日又鍾意睇TWEENIES嘅VCD，一次又一次咁睇，有時會冇喇喇爆個英文字問我哋點解。但聽力OK唔等於英默就得，雖然而家同佢預默，佢唔識嘅字我會拖長字嘅發音，等佢估吓，但我諗最好都係上海埋英文拼音班好d（好彩仁紀都有）。
(3) 早啲同佢玩默書：其實將d字貼係屋企當時處都幾有用，我囡有個同學仔就係咁識架嘞（不過佢唔識背默A-Z）
(4) 試試同佢玩字咭遊戲：新雅出了套中英字咭，可以同佢地當啤牌咁玩，玩潛烏龜或配對都得，等佢可以遊戲中識吓字。
(5) 坊間有不少電腦遊戲有助幼兒識語文，不妨俾佢哋玩多d，我個囡嘅拼音知識有部分係嚟自家長送玩嘅小熊維尼ABC嘅碟。而另一家長送的公主書+CD，曾經令囡囡百聽不厭，不過另一家長送嘅”智高FUN” ，就因為我以前要返工，少陪佢玩而受冷待，但佢隔鄰個朋友仔就極鍾意玩，對認中文同學邏輯都督應有幫助。
(6) 得閒出街同佢地玩吓”時地人” ，即係叫佢地講出時間、人物、地點、事件等六何，幫佢地組織思維，又可以叫佢講幾個詞（小朋友通常會講名詞），你又講幾個，然後輪流作個故事，規定故事要提到那幾個詞等──呢d係有家長返荊冕堂家長團契學到，然後同我個囡玩嘅，有時喺等車等人時，都係唔錯嘅娛樂嚟架。
(7) 趁得閒，學番門樂器，更可能是考名校嘅指定動作。
成日都講得咁長氣，真係唔好意思，因為要趕工，會消失一排，還番個地盤俾你地。
64/181
首頁|前頁|下頁|尾頁
.
Powered by Baby Kingdom
立即打開